குடாநாட்டில் 7 நலன்புரி நிலையங்களில்
212 குடும்பங்கள் அடிப்படை வசதியின்றி வாழ்க்கை

வன்னிப் பிரதேசத்தில் இருந்து யாழ்.குடாநாட்டில் மீளக்குடியமர வந்துள்ள 212 குடும்பங்கள் இருப்பிட வசதிகள் மற்றும் அடிப்படை வசதிகள் அற்ற நிலையில் மாவட்டத்திலுள்ள ஏழு இடம்பெயர்ந்தோர் நலன்புரி நிலையங்களில் பெரும் கஷ்டமான நிலையில் வாழ்ந்து வருகின்றனர்.

இத்தகைய குடும்பங்களுக்கான உதவிகளை வழங்குவதற்கு இதுவரையும் எந்தவொரு நிறுவனமும் முன்வரவில்லை என இக்குடும்பங்கள் சார்பில் தெரிவிக்கப்பட்டுள்ளது.

இதேவேளை, இக்குடும்பங்கள் தமக்குத் தெரிந்தவர்களின் முகாம் வீடுகளில் இணைந்து வாழ்வதால் ஏனைய குடும்பங்களும் பல்வேறு நடைமுறைப் பிரச்சினைகளையும், மருத்துவ, சுகாதாரப் பிரச்சினைகளையும் எதிர்நோக்கியுள்ளனர் எனத் தெரிய வருகின்றது.

இந்த வகையில் தெல்லிப்பளை பிரதேசத்திலுள்ள கோணல்புலம், நலன்புரி முகாமில் 50 குடும்பங்களும், ஊரணி மற்றும் நீதிவான் முகாம்களில் 20 குடும்பங்களும், கோப்பாய் பிரதேசத்தில் கிருஷ்ணன் கோவில் பகுதியிலுள்ள முகாமில் 12 குடும்பங்களும், உடுவில் பிரதேசத்திலுள்ள சபாபதிப் பிள்ளை முகாம் மற்றும் மட்டக்கச்சி முகாம்களில் 49 குடும்பங்களும், சங்கானை காட்டுப்புலம் முகாம், கம்பனை முகாம் மற்றும் நீதிவான் முகாம் ஆகியவற்றில் 30 குடும்பங்களும், சண்டிலிப்பாய் பிரதேசத்திலுள்ள சண்டிலிப்பாய் வடக்கு முகாம், அட்டகிரி முகாம், மற்றும் புலவர் முகாம் ஆகியவற்றில் 38 குடும்பங்களும், பருத்தித்துறை, இலட்சுமணன் தோட்ட முகாம் கம்பனை முகாம் சென்லூர்த்து மாதா முகாம் கற்கோவளம் முகாம், ஆகியவற்றில் 13 குடும்பங்களுமாக மொத்தம் 212 குடும்பங்கள் மிகவும் கஷ்டப்பட்ட நிலையில் வாழ்ந்து வருகின்றன.

சங்கானை, மருதங்கேணியைச் சேர்ந்த 1049
குடும்பங்களுக்கு மீள் குடியமர்வு கொடுப்பனவு


யாழ்ப்பாண மாவட்டத்திலுள்ள சங்கானை, மருதங்கேணி, தென்மராட்சி, கரவெட்டி ஆகிய பிரதேச செயலாளர் பிரிவுகளைச் சேர்ந்த மேலும் 1049 குடும்பங்களுக்கு மீள் குடியமர்வுக் கொடுப்பனவாகிய 25 ஆயிரம் ரூபா வழங்கப்படவுள்ளது.

இதன்படி சங்கானையில் 166 குடும்பங்களுக்கும், மருதங்கேணியில் 655 குடும்பங்களுக்கும், தென்மராட்சியில் 149 குடும்பங்களுக்கும், கரவெட்டியில் 79 குடும்பங்களுக்கும் இக்கொடுப்பனவு வழங்கப்படும்.

இதனைத் தவிர ஏற்கனவே 6 ஆயிரம் குடும்பங்களுக்கு இக்கொடுப்பனவு வழங்கப்பட்டுள்ளது. இதனையும் சேர்த்து யாழ். குடாநாட்டில் மொத்தம் 7 ஆயிரத்து 49 குடும்பங்கள் இக்கொடுப்பனவைப் பெற்று விட்ட நிலை ஏற்படும்.

இதேசமயம் இன்னமும் குடாநாட்டில் 33 ஆயிரம் குடும்பங்களுக்கு இக்கொடுப்பனவு வழங்கப்பட வேண்டும் என்பது குறிப்பிடத்தக்கதாகும்.